Македонскиот репрезентативен голман, Никола Митревски, продолжува да добива награди поради одличните игри во дресот на Порто, откако се најде во тимот на 13. коло од Лигата на шампионите.

Тој беше извонреден во дуелот на португалскиот тим против Фленсбург и еден од најзаслужните што неговиот состав извлече бод (26-26) во пресметката со силниот противник.

Покрај македонскиот голман, во овој идеален тим на колото во ЛШ се најдоа уште и Давид Мандиќ од Загреб, Петар Ненадиќ од Веспрем, Феликс Клар од Монпелје, Харалд Рајнкинд од Кил, Мариус Штајнхаузер од Фленсбург и Мохамед Мамдух од Динамо Букурешт.

Митревски се најде и на Топ 5-листата најдобри голмански интервенции, освојувајќи го четвртото место, со одбраната со која во последните секунди го запре Менсах Ларсен (види ТУКА) и се погрижи Порто да не загуби на гостувањето против Фленсбург.