После девет години поминати во дресот на Вардар, една од иконите на црвено-црните Тимур Дибиров на крајот на сезонава ќе си замине од македонскиот ракометен шампион, откако ја објави својата конечна одлука, иако плановите на рускиот репрезентативец му биле да одигра уште една година пред да замине во пензија.

Тимур Дибиров во Вардар дојде кога почна да се создава моќниот македонски ракометен првак, беше еден од темелите на клубот, кој во 2017 и 2019 година стигна до две европски титули и доминираше во македонскиот ракомет, но сега левото крило заминува како еден од последните што останаа од шампионските генерации кои ја покорија Европа.

„Оваа сезона е моја последна во дресот на Вардар. За жал овој меч со Веспрем во Скопје беше мој последен во Лигата на шампионите и најмногу што би сакал е во Битола да победиме, да ја освоиме титулата и така да се збогувам со Вардар. Ова е моја одлука!

Мој план беше следната сезона да ми е последна, некаде на средина да објавам дека се повлекувам. Не е проблем во парите, ниту зборувам дека не сум добил договор, едноставно…“, рече Дибиров во интервју за „Само Ракомет“.

Дибиров е еден од најдобрите стрелци во историјата на Лигата на шампионите со над 1.000 голови, остварување кое го имаат малкумина во европскиот ракомет.