Во хотелот “Дрим ” во Струга, покрај Охридското езеро, и на истекот на реката Црн Дрим се одржа промоција на монографијата „Струшка фудбалска историја“ чиј автор е истакнатиот спортски ентузијаст, поранешниот фудбалски судија од Струга, и поранешен фудбалер на ФК Караорман  Љупчо Мојсоски.

Присуствуваа голем број љубители на фудбалската игра, поранешни фудбалски репрезентативци на Македонија од струшкиот крај и околината, голем број на спортски работници.

Монографијата е издадена по повод 53 години од формирањето на Општинскиот фудбалски сојуз на Струга, еден од најдобрите и најорганизирани фудбалски сојузи во Македонија, во кој своевремено членуваа и фудбалски клубови од општините Охрид, Ресен и Дебар.

Делото на Мојсовски е секако плод на една со години долга и макотрпна работа, и авторот на оваа монографија заслужува едно огромно признание
Љупчо Мојсоски подготви една навистина прекрасна монографија во која на преку 300 страници се објавени повеќе од над илјада фотографии на сите клубови кои во изминатите 53 години што биле дел од овој општински сојуз. Во неа се презентирани плејада на фудбалери кои играле за репрезентацијата на Македонија во сите селекции, судии, членови во работни тела во Фудбалска федерација на Македонија а кои потекнуваат од струшкото поднебје.

Секако своевиден раритет во оваа монографија се сигурно конечните табели на сите досегашни првенства на Општинската лига на Струга. Во неа има и мноштво други податоци кои ќе го привлечат вниманието на пошироката фудбалска јавност.

„Струшка фудбалска историја“ е монографија која сигурно е едно од најубавите и најрепрезентативните изданија за фудбалскиот спорт во Македонија.