Кошаркарите на МЗТ Скопје со трофеј во Суперкупот ја почнаа новата сезона, откако во денешната пресметка за трофејот „Драган Василов-Цевка“, во драматичен ме со драма во финишот, го совладаа најголемиот ривал Работнички (79-78), најмногу поради фантастичната игра во третиот период во кој постигнаа дури 31 поен.

Ремонтираниот тим на центарци, во кој немаше ниту еден кошаркар од минатото првенство, се држеше само во првото полувреме, во кое постојано беше во водство и тоа со најмногу седум порани разлика (17-10). Добрата игра на црвено-белите траеше до водството 42-36 на стартот од третиот период, по што аеродромци ја презедоа контролата и со серија 13-0 направија целосен пресврт (49-42). Пред крајот на четвртината, избраниците на тренерот Дарко Радуловиќ дојдоа и до првото двоцифрено водство (59-48), што беше најава за крајниот епилог.

МЗТ по две ипол минути од последниот дел од мечот дојдоа до највисоките плус 14 (72-58), но тогаш како да застанаа. Тоа го искористи тимот на Тони Симиќ, кој со серија 12-0 се врати целосно во натпреварот и најава голема драма. Сино-белите, за среќа, го имаа расположениот Адем Мекиќ, кој постигна неколку исклучително важни тројки со кои речиси сам го одбрани последниот налет на противникот.

Јунакот Мекиќ беше убедливо најефикасен на натпреварот со 27 поени и со пет тројки од десет обиди, а веднаш зад него беше Дамјан Стојановски со 16 поени (четири тројки). Недин Мустафица со 24 и Емерсон Џексон со 23 поени беа најпрецизни кај Работнички.

Тоа беше прв меч со публика по едно ипол годишна пауза, што резултира со солидна посетеност, со оглед на правилото за исполнетост само на една третина од трибините во СРЦ „Кале“ и атмосфера која на моменти потсети на некои стари добри дерби пресметки со навивачки групи на обата тима.