НБА првакот од 2023 година беше совладан од Оклахома Тандерс на домашен терен со 87-102 и покрај трипл дабл ефектот на Никола Јокиќ. Денвер на овој меч се истакна само на почетокот бидејќи на средина од првиот квартал водеше со 19-10. Се останато помина во знакот на Оклахома која до половината на третата четвртина имаше солидно водство, а потоа направи серија од 10-0 и отиде на 85-66 што се покажа недостижно за Денвер.
Александер Гилџес Александер и Чет Холмгрен доминираа на теренот, Канаѓанецот постигна 28 поени, 8 асистенции и 7 скока, а центарот на Оклахома оствари дабл дабл со 25 поени и 14 скока. Никола Јокиќ ја почна сезоната со трипл дабл од 16 поени, 13 асистенции и 12 скока, но тоа може да послужи само за неговата статистика бидејќи тоа не беше доволно за триумф на Денвер.
Од останатите натпревари, шампионот Бостон го одигра вториот натпревар во новата сезона и веќе дојде до втората победа бидејќи го совлада Вашингтон како гостин со 122-102.
