Македонскиот репрезентативен центарфор Илија Несторовски порача дека Македонија има и квалитет и сила да го помине европскиот првак Италија во мундијалскиот полуфинален бараж на 24 март во Палермо, меч за кој признава дека ќе биде посебен за него.

Несторовски три години беше дел од Палермо пред сицилијанската гордост да банкротира, а тој да замине во Удинезе, каде не добива премногу шанса, но силно верува во оваа генерација на македонската селекција, потенцирајќи дека моментно е комплетно мотивиран со една цел да биде во топ форма ако добие повик за да ѝ помогне на репрезентацијата на пат кон нова историја – настап на Светското првенство.

„Прво да добијам повик, зашто целта и мотивацијата ми е да работам напорно за да ѝ помогнам на репрезентацијата. За мене пресметката во Палермо ќе биде посебна, зашто Италија е мој дом веќе со години. И мислам дека можеме да ја елимнираме Италија. Со настапот на Еуро 2020 покажавме дека сме храбар тим, многу тврд за секој противник, а колку сме добри покажавме во Германија. Кога ќе го соберете ова, мислам дека имаме големи шанси“, вели Несторовски.

Прилепчанецот ги посочува сега веќе пензионираниот Горан Пандев и младиот Елиф Елмас како фудбалери кои посебно се истакнале со својот неверојатен талент и квалитет.

„Со Горан беше привилегија да се игра, зашто е голем шампион, има освоено ЛШ, неверојатен талент кој ѝ денеска може да направи разлика на теренот. Неговите лидерски способности се посебни, секогаш со него го давате најдоброто од себе. Елмас е неверојатен талент, момче кое има 23 години, а веќе прави разлика на теренот и игра во така голем клуб како Наполи. Од Бог му е дадена неверијатна техника, има квалитет и многу е разновидем. Може да игра каде сакате, лево, десно во центар. Во репрезентацијата е од дете, а уште од тие денови покажуваше дека ќе биде голем играч“, потенцира Несторовски.

Тој во април лани ги скина лигаментите и го пропушти дебито на Македонија на големата сцена, но беше дел од Еуро 2020 како дел од комплетната репрезентација.

„Повредата беше ужас, но од прв ден добивав пораки со поддршка, а ми помогна многу и селекторот (Игор Ангеловски – н.з.) со самото присуство во соблекувалната, каде што можев да ги поддржам соиграчите. И со самото тоа што од страна го гледав Еуро 2020 беше големо искуство за мене“, додава Несторовски.