Репрезентативецот на Габон Пјер Емерик Обамејанг постигна два гола против Реал Мадрид во големото „Ел Класико“ дерби, имаше и една велемајсторска асистенција, aма огромно внимание привлече  со својата специфична прослава која во детали  им ја објасни на седмата сила.

Извонредниот голгетер кој пристигна како слободен агент, фудбалски се препороди под палката на Чави Ернандес и се покажа како огромно засилување за Барселона, на седум натпревари постигна седум голови. Бесен е на критичарите кои го нарекуваа „ истрошен фудбалер” па поради тоа, и самиот реши да им возврати.

Што се однесува пак до неговата прослава после големиот триумф, Обамејанг вели дека таа е инспирација од познатата анимирана стрип-серија „Змејска топка“ (Dragon ball), односно од главниот херој Гоку.

– Она што го држев во едната рака беше замислена топка од „Змејската топка“. Со тоа си замислувате желба. Пред натпреварот, замислив да постигнам гол и да победам.Сакав да постигнам гол за моите баба и дедо кои веќе не се со нас. Мислев за тоа пред натпреварот и на крајот ми се оствари желбата! – објасни Обамејанг новиот миленик на каталонскиот гигант кој што по се изгледа ја надминува кризата.