Женската македонска фудбалска репрезентација запиша нов двоцифрен пораз во овие мундијалски квалификации, вечерва на Националната Арена „Тодор Проески“ во Скопје, откако првиот фаворит и лидер во групата Англија нѐ победи со 10-0 во седмото коло од овој циклус.

Англичанките во Скопје дојдоа како апсолутни фаворитки, без примен гол во досегашниот тек од квалификациите, па само прашање беше со колку гола ќе си заминат од Арената, а ни дадоа по пет во двете полувремиња за наш втор најубедлив пораз, после единаесетката од Северна Ирска во ноември лани.

Бет Мед постигна четири гола (6., 12., 47., 53-та минута), Ела Ен Тун додаде хет-трик (24., 74., 78.), Џорџија Станвеј погоди двапати (46., 56.), а еден гол постигна и Елен Вајт (42.). Англија со победата го продолжи максималниот ефект од седум победи и со 21 бод е убедлива во групата со неверојатни 63 дадени гола и ниту еден примен, додека Македонија остана претпоследна со само три бода и 48 примени голови во седум кола.

Следен меч на македонските фудбалерки е пресметката во вторник на гости кај Луксембург, кој нѐ победи во Охрид со 3-2