Македонската ракометна репрезентација можеше да мине многу подобро на вчерашниот прв меч за пласман на СП 2023 против Чешка во Злин, со оглед на водството со седум голови, но на крајот мораше да се задоволи со одлично реми (24-24), кои исто така ни ги отвора вратите од следниот Мундијал.

И покрај лошата партија и спасот во последен час од пораз, Чесите денеска искажуваат (пре)голема самоувереност пред реваншот во Скопје.

„Вчерашниот меч беше многу тежок, отворивме лошо и нервозно, но се вративме во вистински момент и останавме непоразени. Самодовербата постепено ни се враќаше и знаев дека можеме да се вратиме во игра. Сега сум уверен дека ќе стигнеме до позитивен резултат во Скопје и дека ќе патуваме на Мундијалот“, вели Матијас Чолева, еден од чешките репрезентативци.

Средбата која ќе го даде одговорот која селекција ќе игра на СП 2023 ќе се одигра в недела во салата „Борис Трајковски“.