Наполи се зацврсти на третото место во Серија А и после кризата со три меча без победа, стигна до втор триумф во низа, но сето ова е задоцнет победнички финиш на наполитанците, кои поради мини-кризата испаднаа од шампионската трка со Интер и Милан, па само теоретски сѐ уште се во игра со пет бода заостанување зад „нераѕурите“ на две кола до крајот.

Фабијан Руиз во 73-та минута со соло продор ја донесе победата во Торино против „биковите“ со 1-0, откако првата ѕвезда на тимот Лоренцо Инсиње промаши пенал и за Наполи ова беше 22-от сезонски триумф со кој сега имаат 73 бода, зад Милан кој е втор со меч помалку со 77, а Интер е лидер со 78.

Македонскиот репрезентативец Елиф Елмас играше денеска само 13 минути откако во завршницата влезе во игра после водството на Наполи, заменувајќи го Инсиње.

Торино со 13-от пораз остана на 10-то место со 47 бодови.