Македонската легенда Горан Пандев, икона и на Калчото со своите безмалку 500 настапи и над сто голови, како газда на Академија Пандев неодамна потпиша партнерски договор со италијанскиот аматерски тим од Милано, Брера, по што струмичани најавија една нова ера во која главна цел ќе биде – шампионската титула.

Пандевци завчера се пофалија со партнерството со аматерскиот тим од Милано, најавувајќи една поинаква и современа приказна, откако лани првпат овој тим стигна до вицешампионската круна и втор излез во Европа после освојувањето на Купот во 2019 година, како најголем успех досега.

Пандев кој е рекордер по број на настапи (122) и голови (38) за Македонија посочи дека со партнерството со Брера, сега ќе може да се исполни сонот Академија Пандев во иднина да ја освои шампионската титула, а и да игра во групите во – Лига Европа.

„Многу брзо откако Брера ме контактираше за Академија Пандев, јас веднаш реков ‘ДА“. Тоа е фасцинантен проект од две причини. Прво зашто Милано е градот кој ме прими како дете и сега чувствувам дека нешто му враќам. Второ зашто Брера ќе ми помогне да го остварам сонот – да бидам македонски првак и да играме групи во Лига Европа“, вели Пандев.

На Академците сезонава не им оди најдобро, зашто по седум меча имаат седум бода, но дури пет порази откако вчера загубија и од Македонија ЃП, па моментно се осмопласирани со ист број на бодови како и Работнички кој е осмопласиран.