Македонската фудбалска репрезентација се екипира денеска во хотелот „Хилтон“ во Скопје за да ја започне подготовката за последната етапа од овој циклус во Лигата на нациите, со дербијата против Грузија и Бугарија во битка да стигне до првото место во групата.

Македонија ја очекува многу тешка задача, пред сѐ во пресметката за првото место со Грузијците, каде ќе мора да брка убедлива победа после скопските 0-3, а дополнителен проблем е што селекторот Благоја Милевски ги нема сите расположливи сили откако тројца од првичниот список отпаднаа поради повреди (Дарко Чурлинов, Валон Етеми, Стефан Ристовски), а тројца воопшто не се повикани зашто до минатата недела немаа клуб (Давид Бабунски, Кире Ристевски, Бобан Николов).

Расположението кај фудбалерите е на ниво, зашто после три месеци ова е нивни прв собир, а допрва ќе почне да се крои тактиката прво за гостувањето во Тбилиси, па за балканската пресметка со Бугарија во Скопје. Првиот тренинг е денеска од 17.30 часот на тренинг-центарот на ФФМ.