Најголемата сенегалска фудбалска ѕвезда Мане, ќе биде дел од репрезентацијата на претстојното Светско првенство во Катар. Тој е еден од 26-те фудбалери на списокот на селекторот Алиу Сисе, но прашањето е друго: ќе може ли да игра?

Мане се повреди во неделата, на 12 дена до првиот натпревар на Сенегал на Мундијалот. Извештаите за повредата беа различни, прво од Баерн  дека не е сериозно, потоа дека станува збор за повреда на потколеницата, од која Мане знаел и порано да страда. Заклучок со најголема веродостојност е дека тој можеби ќе биде подготвен да игра ако Сенегал се пласира во нок-аут фазата.

Точно е дека Мане е лидер на тимот и најголем адут на Алиу Сисе, но Сенегал располага со уште ѕвезди кои настапуваат во Европа. На списокот се најдоа капитенот Калиду Кулибали (Челси), Едуард Менди (Челси), Исмаила Сар (Вотфорд), Идриса Геј (Евертон), Бамба Диенг (Марсеј).

Првиот натпревар за Сенегал е на 21 ноември со Холандија и сигурно дека Мане нема да игра на него. На 25 ноември е дуелот со домаќинот, Катар, а четири дена подоцна против Еквадор.