Со огромна доза на разочарување и со неисполнета желба за победа, македонските ракометари денеска се преселија од Краков во Плоцк. Таму ќе ги играат преостанатите четири натпревари, кои ќе одредат на кое место ќе се пласираме во конечното рангирање на СП.

Противници ни се Алжир, Тунис и Мароко, ни малку наивни селекции од северна Африка, кои исто така го освоија последното место во своите групи.  Во моментов тие се параметар за нашата сила и квалитет, па ќе мора да се обидат ракометарите да ја премостат огорченоста за конечно да го почувствуваат  мирисот на победата.

„Секако сакаме да ја почувствуваме сласта на некоја победа. Сакаме и да добиеме некој играч плус, да им се даде шанса на сите. Сакаме да не паднеме во депресија и да пробаме да извлечеме максимум од тие три натпревари. Да одиграме со послаби противници, па да видиме каде сме. Не треба да бидеме депресивни, незадоволни да, но и да преземеме одговорност. Да ги искористиме овие натпревари“, изјави Лазаров.

Првиот натпревар Македонија го игра веќе утре од 15.30, против Алжир.