Абердин во саботата одигра 2:2 во дуелот со Хибернијан во шкотското фудбалско првенство, а менаџерот Нил Ворнок смета дека неговиот тим не добил чист пенал по стартот на гостинскиот голман над Бојан Миовски.

Македонскиот репрезентативец овојпат не постигна гол, но повторно беше голема опасност во противничкиот шеснаесетник, а при резултат 2:1 заработи незгоден удар од ветеранот Дејвид Маршал.
Судијата не досуди ништо, а не реагираше ниту ВАР собата, па искусниот Ворнок по мечот обвини дека Абердин е повторно оштетен, затоа што таков старт секаде на друго место би бил прекршок за пенал.

– Да бидам искрен, тоа беше обид за убиство. Бојан прв дојде до топката. Маршал ја закачи, но потоа го нокаутираше Миовски.

Некој што го разбира фудбалот веднаш би покажал на белата точка, но нашиот проблем е што правдата ја делат судии кои никогаш не играле фудбал. Ако беше на друг дел од теренот, ќе беше старт за жолт картон, навистина сум збунет.

– Не знам што и каде гледаат, на претходниот натпревар ни направија нешто слично со офсајдот. Миовски дефинитивно прв дојде до топката, а потоа заработи и сериозен удар, – изјавил лутиот Ворнок.