Барселона го загуби последното „Ел Класико“ дерби со Реал Мадрид во шпанското првенство, а фановите на каталонскиот клуб и натаму сметаат дека нивните миленици биле сериозно оштетени со фактот што голот на Ламин Јамал не е признат од страна на судиите.
Главниот судија и неговите ВАР асистенти одлучија дека топката не минала со цел обем зад гол-линијата по ударот на Јамал, а фактот што не ја користи технологијата за следење на гол-линијата дополнително ја вжешти дебатата во медиумите и на социјалните мрежи.
„Мундо Депортиво“ денеска објави ново видео, кое анонимен фан го објавил на својот „Икс“ профил и од истото заклучува дека Барселона дефинитивно е оштетена и топката целосно завршила зад гол-линијата пред интервенцијата на голманот Лунин.
Претседателот на Барса, Жоан Лапорта, најави дека ќе бара преигрување на натпреварот ако биде утврдено дека судиите не признале гол за неговиот тим.
