Новак Ѓоковиќ е олимписки бог, влезе во бесмртните – конечно го освои златниот медал на ЛОИ во Париз!

Најдобриот српски, но и светски тенисер Новак Ѓоковиќ конечно го освои златниот медал на Олимписките игри и ја дополни својата богата колекција, откако во финалето триумфираше против Карлос Алкараз во два сета и после два тај-брејка со 7-6 и 7-6.

Српскиот тенисер Новак Ѓоковиќ го освои единственото одличје кое што му недостигаше во преполната кариера – златниот медал на Олимписките игри!  Вториот светски рекет слави во финалето против Карлос Алкараз со 2-0 по епска битка која траеше безмалку три часа. Двајцата тенисери прикажаа врвен тенис, играа атомски тенис за забава на публиката на „Филип Шатрие“. Иако Алкараз одигра одлично и не грешеше премногу, искуството на Србинот беше пресудно во ова финале.

Ѓоковиќ ја имаше првата брејк топка во вториот гем од сетот, но успешно се одбрани Шпанецот, по што Србинот повторно го нападна неговиот ривал, но пропушти три-брејк топки во четвртиот гем.

Алкараз потоа заигра подобро и притисна, меѓутоа Ѓоковиќ успешно се бранеше во продолжение и спаси дури осум брејк-топки, по што во тај-брејк се решаваше победникот, односно српскиот тенисер славеше со 7-3.

Во второт сет двајцата тенисери беа сигурни на свој сервис и успешно ги освојуваа гемовите до 6-6, каде што Алкараз целосно се распадна, додека Ѓоковиќ лесно освојуваше поени до 7-2.

Ѓоковиќ во својата богата кариера е најтрофеен тенисер по број на гренслем-пехари, односно има 25, но во колекцијата му недостигаше златниот медал.