Седумкратниот светски првак во Формула 1, Луис Хамилтон веќе извесно е дека ќе вози за Мерцедес и во претстојната нова сезона, откако се појави во централата на германскиот гигант после неколку неделна „изолација“ од социјалните медиуми, со што става крај на шпекулациите дека можно е да се пензионира по поразот во Абу Даби и загубената шампионска круна од Макс Ферстапен.

Хамилтон не ја исклучи можноста за повлекување, но откако пред неколку дена се појави со слика на социјалните мрежи, сега Мерцедес се пофали дека се вратил во централата, а сето тоа се поклопува со стартот на тестирањата во пресрет на новата сезона, па Британецот сигурно ќе биде дел од сезонава и ќе се обиде да го надмине легендарниот Михаел Шумахер со кого сега го делат првото место по број на титули – по седум.

За 23 февруари е закажано тестирањето во Барселона на Мерцедес, а пет дена потоа според најавите ќе има официјална промоција на возачкиот двоец на овој гигант во новата сезона во Ф1.