Третиот тенисер во светот, Германецот Александар Зверев, кој беше исфрлен од турнирот во Акапулко откако неколку пати удри во судиското столче со рекет за време на меч во двојки, беше казнет од АТП со 40.000 долари.
На германскиот тенисер, кој лани во Токио го освои златниот олимписки медал, му се одземени добивките од турнирот во Мексико во вкупен износ од 31.570 долари (28.160 евра), како и освоените бодови за поединечната и ранг-листата во двојки.
„Ова претставува максимална казна за секој прекршок“, ја објасни својата одлука АТП, додавајќи дека „додатната ревизија“ ќе биде извршена „во согласност со правилата на турнејата“.
Зверев „молеше за прошка“ по поразот на двојки во вторникот. Во објава на својот Инстаграм профил, тој напиша дека „приватно му се извини на главниот судија Алесандро Германи“ по неговиот „неприфатлив“ испад.
Откако тој и Бразилецот Марсел Мело беа поразени во парови од Британецот Лојд Гласпул и Финецот Хари Хелиовааре со 6:2, 4:6, 10:6, Зверев три пати го удри судиското столче, седна, а потоа стана да го навреди службеното лице и повторно удри со рекетот.
По тој испад, тој беше исклучен од турнирот во Акапулко во поединечна конкуренција и затоа не можеше да го одигра натпреварот од второто коло во средата против неговиот сонародник Петер Гојовчик.
