Третата победа по ред за Сасуоло, која ја оствари кај Венеција со 4-1, го остави да се надева дека може да стигне до позициите кои водат во Лига Европа или Конференциската лига, иако сè уште е рано да се зборува за такво нешто, додека Фиорентина одигра 1-1 против Верона.

По само 29 минути игра беше јасно дека Сасуоло ќе ги освои трите бодови, откако прво Распадори стрелаше за 1-0, а потоа Берарди и Скамака зголемија на 3-0. До крајот на првиот дел Анри погоди за Венеција, но само да намали на 1-3.

Венеција имаше доволно шанси да освои барем бод, но времето ги газеше, а надежта целосно им се урна во 71. минута, кога Берарди од пенал погоди за конечни 4-1.

Фиорентина поведе со голот на Пјонтек во 10. минута од натпреварот, а само 10 минути потоа Капрари израмни на 1-1 од пенал и така двете екипи си поделија само по еден бод.

Сасуоло е на осум бодови од местата кои водат во европските натпреварувања, додека Фиорентина има 43 и ја делат само четири бода од петтата позиција.