Зад екипата на Селта е сезона за заборав во Ла Лига во која повеќе беа во зоната за опстанок отколку во горниот дел од табелата, нешто на што беа навикнати, поради што управата на клубот сака да направи реконструкција, а меѓу главните нови имиња се споменува нашиот – Енис Барди.

Се споменува заминување дури на десет фудбалери од сегашниот состав, а челниците на клубот во македонскиот репрезентативец гледаат квалитет за враќање кон врвот од шпанската елита и борбата за излез во Европа. Селта уште во јануари стапила во контакт со челниците на Леванте, чиј фудбалер е Македонецот, за негов евентуален трансфер при евентуално испаѓање, што и се случи.

Барди е проценет на околу 5,5 милиони евра, сума која не би била проблем за тимот од Виго, со оглед што би добиле фудбалер кој добро ја познава Ла Лига, зборува шпански и кому не би му требало време за адаптација на новата средина, а згора на тоа има само 26 години. Селта е третиот шпански клуб кој изминативе денови пројави интерес за македонскиот репрезентативец, откако претходно тоа го направија Валенсија и новакот во елитата, Алмерија.