Австралиските фудбалери дојдоа на чекор до пласман на Светското првенство, бидејќи беа подобри од Обединетите Арапски Емирати со резултат 2:1 (0:0).
Во полуфиналето од баражот за пласман на СП, „кенгурите“ се изборија за мечот против Перу кој се игра на 13 јуни и тој меч ќе биде последниот чекор за двете репрезентации што треба да го прескокнат за да одат во Катар.
Победникот од тој дуел на Мундијалот ќе игра во групата Д заедно со Франција, Данска и Тунис.
По напорното прво полувреме Австралија поведе во 53. минута со голот на Џејсон Ирвинг по асистенција од десната страна на Мартин Бојл.
Сепак, нивната радост траеше само четири минути бидејќи толку им требаше на Емиратите да израмнат преку снаодливиот Кајо Канедо.
Австралија беше нешто подобар ривал и во 84. минута стигна до победа што и обезбеди пласман во финалето на овој интерконтинентален бараж.
Играчот со потекло од овдешните простори Ајдин Хрустиќ, фати фантастичен волеј и ја катапултираше топката кон голот на Емиратите, а таа на патот кон голот закачи еден играч и се најде во мрежата.
