Репрезентацијата на Македонија до 18 години го освои првото место во својата група на СП, кое се одржува во Скопје. Максималниот ефект со три победи во три меча го задржаа вчера против Иран, совладувајќи го со 31-19, со што се пласираа во главната фаза, каде што ќе вкрстат со Шведска и со Исланд.

Иако беше видно посилна селекција од Узбекистан и од Сенегал, Иран се носеше со Македонија едвај едно полувреме и тоа поради наши грешки.

По почетните 3-0, следниот го дадоа дури во 17-тата, но за среќа одбраната функционираше добро, па губеа само со еден негатива. Работите почнаа да се местат според желбите на Савевски, Македонија се одлепи и на пауза замина со 11-8.

Второто полувреме беше, можеби, најдоброто досега за македонските надежи,  нападот функционираше многу подобро. Со неколку кратки серии од по 3-0, во 48. минута првпат дојдоа до двоцифрена предност, 23-13, а до крајот резултатот беше само формалност. Теодора Дукоска беше најдобар стрелец со шест погодоци во нашата репрезентација, а по четири дадоа Младеновска, Борјана Коцева, Ризоска и Јанкуловскa.

Ова значи дека Македонија го освои првото место во групата Б и продолжува во главната фаза, каде што ќе вкрсти со првиот и вториот од групата А, Исланд и Шведска. Во таа група 1, продолжуваат и Иранките, како втори од нашата прелиминарна група, при што Македонија ги пренесува двата бода освоени против нив и со почетна предност ќе тргне кон освојување на првото или второто место, кои водат во четвртфиналето. Утре од 20.30 играме против Шведска, која го освои второто место во групата А и ќе има салдо „нула“, а в петок ќе се соочиме со Исланд, кој исто така пренесе два бода.