Холандски ПСВ и украински Динамо Киев после продолженија успеаа да обезбедат пласман во плејофот во Лигата на шампионите и да ги елиминираат Монако односно Штурм Грац, па со тоа ги комплетираа двојките во „финалето“ од квалификациите преку кои шесте победници од двомечите ќе играат во мултимилионската елита.

Лук Де Јонг, ланскиот напаѓач на Барселона е херојот на ПСВ откако даде гол во 109-та минута од мечот за конечни 3-2 и вкупни 4-3 за „филипсовците“ во пресметката со Монако. После ремито 1-1 во малото кнежевство пред една недела, ПСВ на минута пред крајот се спаси од елиминација, иако прв поведе во 21-та минута преку Верман, но Монако дојде до пресврт со головите на Марипан во 58-та и на Бен Једер во 70-та, за Гитиерез да обезбеди продолженија, а Де Јонг да го реши прашањето за победникот.

Динамо Киев со 2-1 по продолженија славеше против Штурм, кој по 90 минути го надомести голот негатива од првиот меч, но во дополнителните пола час, Вивчаренко во 97-та и Циганков во 112-та донесоа конечна победа за пласман.

Во плејофот ќе игра и Глазгов Ренџерс кој после 0-2 од првиот меч против белгиски Унион Ројал Сен Жил вечерва победи со 3-0 на својот „Ајброкс“.

Во плејофот за пласман во ЛШ ќе играат Карабах – Викторија Плзен, Бодо Глимт – Динамо Загреб, Макаби Хаифа – Црвена Звезда, Копенхаген – Трабзонспор, Динамо Киев – Бенфика и Глазгов Ренџерс – ПСВ Ајндховен.