Отсуството на Новак Ѓоковиќ на овогодинешниот УС Опен го коментираше и еден од неговите најголеми, ако не и најголеми ривали.

Рафаел Надал смета дека тоа што ќе помине уште еден Грен слем без Ѓоковиќ е тажна вистина, но дека тенисот е поголем од секој поединец.

„Знаевме дека Новак нема да игра на некои турнири доколку не се сменат правилата, нели? Тоа го знаеме со месеци. Од моја перспектива, тоа е тажна вест. Секогаш е срамота кога најдобрите светски спортисти не можат да учествуваат на најдобрите натпревари поради повреди или некои други причини. Во овој случај, секогаш е загуба кога го немате еден од најдобрите играчи во историјата на Грен слем, нели“, рече Надал на прашањето за отсуството на Новак Ѓоковиќ на УС Опен, кој започнува во понеделник.

Шпанецот сепак смета дека самиот турнир треба да биде во центарот на вниманието:

„Спортот е поголем од кој било играч. Во кариерата пропуштив многу турнири поради повреди. Не бев тука минатата година, пред две години исто така. Турнирот функционираше и се помина без проблеми. Иако можеби не е добра вест – тенисот ќе живее по мене, Новак, Роџер… Без сомнение, Новак е еден од најголемите во овој спорт и жал ми е што не е тука“, заклучи Шпанецот кој ќе се обиде да го освои својот 23. Грен слем.