Фулам дотури сол на раната на Стивен Џерард, совладувајќи ја неговата Астон Вила со 3-0. Во првото полувреме не можеше да се насети дебаклот, иако Фулам поведе со голот на Рид во 36. минута. Сепак, односот на силите не беше така изразен во корист на лондонскиот тим, за разлика од вториот дел, кога Вила целосно се распадна. Најголем фактор за тоа беше црвениот картон на Даглас Луиз, во 62. минута, доделен дури откако судијата Мајкл Оливер се посоветува со ВАР.

Како тоа да беше малку, пет минути подоцна Кеш играше со рака во шеснаесетникот, а Митровиќ го претвори пеналот во гол за 2-0. Агонијата продолжи докрај, бидејќи во 83. минута, по шутот на Кабано, топката се одби од Мингс, директно во празниот дел од мрежата на голманот Мартинес за конечни 3-0. Ова е втор пораз по ред за Астон Вила, која нема победа веќе четири меча во Премиерлигата и се наоѓа на 17. место на табелата, со девет бода, колку и Вулверхемптон, кој е во зона за испаѓање.

Затоа веќе се шпекулира дека Стивен Џерард можно е да не го дочека викендов или, во најдобар случај, би добил отказ по него.
https://twitter.com/DEANFOOTBALL1/status/1583190340651347972?ref_src=twsrc%5Etfw%7Ctwcamp%5Etweetembed%7Ctwterm%5E1583190340651347972%7Ctwgr%5E3d354c5e64b40333498a1c650579f9bb24fdd35b%7Ctwcon%5Es1_c10&ref_url=https%3A%2F%2Fsport1.mk%2Ffudbal%2Fligi%2Ffulam-mozhebi-mu-udra-kloca-na-dzherard-lester-siguren-so-lids-video