Македонскиот репрезентативец Енис Барди го даде четвртиот гол за турскиот првак Трабзон откако летово го засили, но неговиот погодок во 70-та минута од мечот беше недоволен за победа, па ремито кај Анкарагучу (1-1) е четврто во последните пет меча.
Барди одигра одличен натпревар и го круниса со гол за водство, изреагира извонредно во акцијата и како врвен центарфор го искористи центаршутот на Максимилијано Гомез. Но само четири минути траеше радоста на Трабзон, откако Чигерчи од пенал израмни. Шампионот со овој бод дојде на 23 бода на шестото место, шест помалку со меч повеќе од лидерот Фенербахче, каде игра репрезентативниот лев бек Езџјан Алиоски.
Барди играше цел меч за Трабзон, а претходно ѝ даде два гола на Анталија во турската Суперлига на своето деби и еден против Монако во Лига Европа од слободен удар.
Следува пауза во турското првенство поради Светското првенство.
