Кошаркарите на Денвер нагетс заборавија на победите, откако на гостувањето кај Торонто репторс (110-125) го претрпеа и четвртиот пораз во низа.
Составот предводен од Никола Јокиќ одигра ужасна прва четвртина во која примаше по четири поени во секоја минута, а победникот беше познат уште по првото полувреме (72-56). Реализираните 49 поени во првите 12 минути е клупски рекорд на „репторси“, каде што најзаслужен за триумфот беше Фред Ванвлит со 36 поени и седум асистенции. Србинот натпреварот го заврши со 28 поени, осум скока и седум асистенции. И покрај црната низа, Денвер останува убедливо прв на Западот со скор 46-23.
Во Источната конференција, го имаме и првиот официјален учесник во плејофот, а тоа е најдобриот тим во НБА, Милвоки бакс, кој ноќеска како гостин го совлада одличниот Феникс санс (116-104). Грчкиот звер Јанис Адетокумбо очекувано беше лидер на „елените“ со 36 поени и 11 скока, додека Девин Букер со 30 поени беше најпрецизен кај „сонцата“ за кои поради повреда не играше Кевин Дурент.
Кошаркарите на ЛА Лејкерс дојдоа до важна победа на гостувањето кај Њу Орлеанс пеликанс (123-108), без повредениот Леброн Џејмс, со која останаа во игра за пласман во плејинот.
РЕЗУЛТАТИ: Шарлот – Кливленд 104-120, Вашингтон – Детроит 117-97, Торонто – Денвер 125-110, Оклахома Сити – Бруклин 121-107, Њу Орлеанс – ЛА Лејкерс 108-123, Сан Антонио – Орландо 132-114, Феникс – Милвоки 104-116
