Италијанскиот шампион Милан стана вистински кошмар и за кратко време трипати се радува против Наполи, вечерва одигра 1-1 на „Диего Армандо Марадона“ со што обезбеди полуфинале во ЛШ, таму ќе биде и Реал Мадрид кој со 2-0 славеше против Челси во Лондон.

Наполи изгледаше неверојатно се додека не почна да ги игра дуелите со Милан, росонерите се покажаа како лек за забревтаните Наполитанци кои го завршија настапот во Европа.

Македонскиот репрезентативец, Елиф Елмас од клупата го почна натпреварот, во игра влезе во 63. минута на местото од Ндомбеле.

Првото големо возбудување на натпреварот беше во 22. минута кога Оливие Жиру промаши пенал, неговиот удар го одбрани Мерет. Но Французинот ја исправи грешката подоцна.

Во финишот од првиот дел, Рафаел Леао имаше фантастичен трк, претрча повеќе од половина терен, го проигра Жиру кој постигна гол за водство на Милан од 1-0.

Милан играше пожртвувано, одлично се бранеше, па Наполи немаше многу шанси за гол. Но се можеше да се промени во 82. минута кога Наполитанците добија пенал. Сепак, Мањан го одбрани ударот на Квича Кварацхелија и не дозволи да се затресе неговата мрежа.

Во третата минута од судиското продолжение Наполи изедначи на 1-1 со гол на Осимен, но немаше време за комплетен пресврт, тоа беше конечниот резултат.

Милан во полуфиналето ќе игра со победникот од дуелот меѓу Интер и Бенфика. Нероазурите имаат предност од 2-0 остварена во Лисабон, па доколку нема изненадување, ќе гледаме миланско полуфинале.