Триумфи за Воска, Гостивар и Вардар-Пелистер загуби во 105 мин.

Воска остана на плус шест пред Вардар кој е трет со триумфот со 3-1 против Арсими, победата која беше јасна уште по првиот дел кога охриѓани му дадоа два гола на тимот од Чегране. Гостивар победи против Охрид со 3-0, ама сѐ беше јасно на полувреме кога гостиварци дојдоа до 2-0.

Гостивар вака останува на два бода пред Вардар, кој со пенал во 84-та минута дојде до важна победа во Турново кај Беласица, а стрелец на голот беше Кристијан Николовски. На вардарци им одговара и резултатот од мечот во Тетово, каде Пелистер не успеа да го совлада Тетекс и да го спакува за третолигашка конкуренција.

Долго време Тетекс водеше со 1-0 во многу тензичниот меч кој траеше безмалку два ипол часа, а Пелистер во 89-та израмни, по што 20-на минути се натегаа сите, влетуваа навивачи, се туркаа фудбалерите, судијата не можеше да врзе крај со крај.

И кога мечот продолжи, а дојде 105-та минута, буквално во последните секунди Христијан Кировски даде гол за победа за „штофарите“ и останување во трката за опстанок.

Каменица Саса и Слога Виница победија во своите мечеви, па сѐ освен победа за Тетекс ќе беше почеток на пакување за Трета лига, но успеаа да останат тетовци во живот и во последните три кола да се борат за барем бараж за опстанок.

Пелистер веќе извесно е дека останува второлигаш и во следната сезона, на девет бода е од третиот Вардар и само математички може да стигнат до крајот, со три победи и три порази на Вардар, што е безмалку невозможно да се случи, особено што црвено-црните имаат два меча со Тетекс и Кожув од последните три како и меѓусебното „Ел класико“.