Актуелниот македонски шампион Струга ја запиша петтата победа сезонава и се проби на второто место во Првата лига, откако попладнево победи во „езерското дерби“ со Воска Спорт во Охрид со 1-0, во заостанат натпревар уште од првото коло.

Репрезентативецот Марјан Радески го одлучи натпреварот, откако четири минути пред крајот  го постигна победоносниот гол со глава и ја обезбеди победата за стружани, кои со 15 бодови се втори.

Тој се снајде најдобро во мешаницата пред противничкиот гол во 86.минута и успеа да ја затресе мрежата на Воска.

Струга ТЛ сега се доближи на само бод од лидерот Шкендија, а има два одиграни натпревари помалку поради настапите на европска сцена.