Карлос Алкарас е во потера на првото место на АТП листата кое му припаѓа на Новак Ѓоковиќ по освоената титула во Њујорк, но Шпанецот сепак ќе мора да бара поени на други турнири по поразот од Синер.

Светскиот рекет број два влезе како прв фаворит на турнирот во Кина, но денеска беше совладан во полуфиналето од тенисерот со кој секогаш имаат интересни дуели.

Јаник Синер е лек за талентираниот шпански тенисер, кој мораше да му подаде рака на својот ривал. Синер во минатото покажа дека знае како да игра против Алкарас, па откако во овој дуел влегоа со меѓусебен биланс 3:3, сега Јаник е тој кој води.

Алкарас подобро го отвори денешниот дуел и поведе со 2:0, но откако не искористи брејк шанса за 3:0, дојде до промена на текот и Синер се врати со брејк. Двајцата загубија по уште еден свој сервис за 3:3, а потоа се стабилизираа на своите сервиси и стигнаа до тајбрејк завршница.

Во клучната фаза од првиот сет, Синер беше помирен и го доби овој дел со 7:4, по што следеше голема нервоза во играта на Алкарас, изразена со тежок пораз во вториот сет.

Јаник направи три брејка и славеше со 6:1, па сега има предност од 4:3 во дуелите со противникот, со кој изградија големо ривалство уште во раната фаза на кариерите.

Противник на Синер во финалето во Пекинг ќе биде Данил Медведев, кој денеска славеше над Саша Зверев со 2:0 во сетови.