Фудбалерите на Арсенал останаа во игра за шампионската титула во Премиер лигата откако славеа на гостувањето кај Нотингем Форест со 2-1.

Тоа е прва победа за „топчиите“ на гостински терен во новата година и прва по пауза од речиси два месеца откако на 5 декември славеше кај Лутон. Малку недостасуваше и вечерва да остане без победа иако имаше солидно водство со 2-0.

Во првиот дел беше мирно, по паузата Арсенал продолжи со добрата игра, се закани Букајо Сака чиј удар го одбрани голманот Тарнер, а ударот на Габриел Хесус заврши во стативата. Отпорот на домашните од Нотингем беше скршен во 65. минута, Зинченко долго изведе аут до Хесус кој влезе во шеснаесетникот и од тешка позиција погоди за 0-1. Веќе во 72. минута предноста беше удвоена, откако во контра стрелецот на првиот гол Хесус го проигра Сака, а крилото постигна гол за 0-2.

Нотингем успеа во финишот да ја врати неизвесноста со голот на Авонијџ во 89. минута, меѓутоа немаше сили за целосно да се врати во мечот и претрпе минимален пораз.

Нотингем во судиското продолжение имаше уште една шанса со која можеше да освои бод.

Со оваа победа, Арсенал стигна до 46 бода и е на второто место на табелата, но има еден меч повеќе од лидерот Ливерпул и два од третопласираниот Манчестер Сити.