Женската ракометна репрезентација на Македонија го загуби и вториот дуел против Шпанија во квалификациите за Европското првенство кое е на програмата оваа година во месец ноември и декемеври во Австрија, Унгарија и Швајцарија.

Нашата селекција се прикажа во подобро издание од првиот дуел во Скопје (31:19), но и тоа не се покажа како доволно за позитивен резултат, односно само го поправивме впечатокот со пораз од 24:20.

Избраничките на Кристијан Грчевски одиграа рамноправно прво полувреме во Лансароте кое му припадна на фаворитот со минимални 10:9. Во вториот дел домаќинките беа подобри, поквалитетни и имаа апсолутна контрола како на резултатот така и на играта и дојдоа до четвртата победа во исто толку средби во групата 5 во која се уште Литванија и Азербејџан.

Најефикасна кај Шпанија беше Пинто со четири голови, додека по три погодоци за Македонија постигнаа Маџовска и Кипријановска.

Во вториот меч од истата група, Литванија му се одмазди на Азербејџан и славеше со 41-26.

Шпанија е прва во групата со осум бодови, по што следи Македонија со четири, додека Литванија и Азербејџан имаат по два бода.