Фудбалската репрезентација на Македонија доживеа пораз од 2-1 против Чешка во вториот пријателски натпревар од овој мини циклус, што се одигра во Храдец Кралове. Сепак, и двата гола за Чесите беа постигнати од пенал, а вториот буквално во последните мигови од натпреварот, по еден „сомнителен“ прекршок што го направи Дарко Велковски во 97.минута.
Антонин Барак го реализираше во 99.минута и обезбеди победа за Чешка, непосредно пред заминувањето на Европското првенство во Германија.
Чешка исто така поведе од пенал во 60.минута од мечот. Реализатор беше Патрик Шик.
Македонија успеа да израмни само пет минути подоцна со голот на Исник Алими. Трајковски го погоди дирекот, а на одбиената топка налета Алими и со удар со глава ја затресе мрежата на домаќинот.
Македонските фудбалери одиграа многу подобар натпревар против Чешка, па и покрај поразот од 2-1, кој дојде и малку „на сила“, значително го подобрија впечатокот во однос на првиот меч против Хрватска во Ријека.
