Македонскиот ракометен првак Еурофарм Пелистер  во Битола го пречека унгарскиот Веспрем, и убедливо загуби со 23-30 (12-17) па останува на дното на табелата. Шанса за бодови битолчани ќе имаат следното коло, кога гостуваат кај данска Фредериција која во ова коло ја изненади Висла и дојде до првиот триумф.

Искусниот стратег Звонко Шундовски привремено го презеде кормилото на пелистерци, а во првиот состав се врати словенечкиот среден бек Тајник.

Унгарскиот првак даде три гола за пет минути и дојде до плус 1-3 против пелистерци. Во продолжение,  блескаше голманот Коралес кој фати неколку важни топки во нападите на македонскиот шампион.

Веспрем имаше позитива од 7-11, а на Еурофарм Пелистер не му помогна ниту расположениот Митревски кој имаше пет интервенции.

Во вториот дел Пасквал често ротираше, а Еурофарм Пелистер го имаше расположениот Никола Митревски, но сепак, до промена на резултатот не дојде. Битолчани константно беа во негатива и ниту еднаш не беа закана за противникот. Унгарскиот првак имаше водство од пет до седум гола , a главен играч во нападот беше средниот бек, поранешниот вардарец Лука Циндриќ. Пред крајот на мечот, црвен картон доби Никола Граховац од Веспрем, заради остар старт врз Петар Атанасијевиќ

Најдобар стрелец на дуелот беше Лука Циндриќ со осум постигнати гола, пред Дескат и Фабрегас со по шест гола, додека голманот Коралес забележа 15 интервенции. Кај Еурофарм Пелистер, Филип Кузмановски стрелаше седум пати, а Борзаш постигна четири гола. Никола Митревски оствари 14 одбрани.