Филип Талески веќе неколку години е еден од најкритикуваните ракометари како за прикажаните игри за Македонија така и за Вардар. Овој пат тој беше самокритичен по вчерашниот пораз на Македонија против Црна Гора (24-28) во вториот меч на ЕП 2022, кој значеше крај на надежите за пласман во вториот круг, а во ист стил продолжи и по преспиената ноќ.

Ракометарот на Вардар повтори дека заедно со соиграчите играле срамно, но потенцира дека сѐ уште имаат шанса за делумно поправање на впечатокот.

„Останувам на констатацијата по вчерашниот натпревар, а тоа е дека одигравме срамно против Црна Гора. Но, нема враќање назад. Мора да се консолидираме зашто нѐ чека уште еден меч и можност да одиграме најдобро што можеме против ривал како Данска, кој игра моќен ракомет и кој атакува на злато на ЕП. Данците, секако, се огромен фаворит и против нас, но сакаме да се надигруваме, па ако одиграме како во Скопје да дојдеме ако можеме до позитивен резултат, во еден добар и борбен натпревар“, изјави Талески.

Средбата против Данците ја играме утре со почеток во 20.30 часот во Дебрецин.