Војниот напад на Русија врз Украина предизвика паника кај жителите на оваа држава, но пред сѐ кај странските спортисти кои настапуваат во украинските клубови, како што е случајот со интернационалците кои играат за двете најдобри фудбалски екипи, Шахтјор и Динамо Киев.

Бразилците од овие два клуба се обединија и во заедничка видео-порака побараа да бидат спасени од Украина. Меѓу нив е и Жуниор Мораеш, кој иако е од Јужна Америка има украински пасош и 11 настапи за својата нова татковина, од која сега сака да побегне.

„Сите наши роднини и пријатели чекаат решение за нашата судбина. Затворени сме во хотелот и чекаме. Ситуацијата е очајна. Ве молиме да го споделите ова видео за тоа да дојде побрзо до нашата влада. Границите се затворени, но и банките. Нема гориво, се помалку има храна, а ние немаме пари. Се собравме сите Бразилци заедно и сакаме веднаш да ја напуштиме Украина“, се вели во обраќањето на фудбалерите.

Војната значеше и суспендирање на првенствата во сите спортови во оваа држава, меѓу кои и фудбалското.