Поранешниот најдобар светски тенисер, Енди Мареј, се обврза дека сите пари што ќе ги заработи во 2022 година ќе им ги донира на децата од Украина, каде што веќе две недели беснее војна по агресијата од Русија.

Двократниот победник на Вимблдон е амбасадор на УНИЦЕФ и соработува со хуманитарна организација која дава медицинска поддршка и работи за лична хигиена на украинските деца.

„Повеќе од 7,5 милиони деца се загрозени од војната во Украина. Затоа ќе ја донирам сета заработка од турнирите на кои ќе играм годинава, бидејќи тие пари ним им се далеку попотребни“, напиша Мареј на Твитер.

Досега во 2022 година, Британецот од наградните фондови на турнирите има заработено речиси 260.000 долари.