Италијанската фудбалска федерација (ФИГЦ) објави пред неполн час дека има два позитивни случаи во стручниот штаб на Роберто Манчини, кои експресно се изолирани, но будно се следи ситуацијата за да не се рашири заразата, само два дена пред клучниот мундијалски полуфинален бараж во Палермо со Македонија, во четврток од 20.45 часот.

Но, иако ФИГЦ објави два позитивни случаи, италијански спортски коментатор и поранешен фудбалер и соиграч на селекторот Роберто Манчини, Дарио Марколин, за „радио Кис Кис“ од Неапол открива дека има дури седум заразени, односно пет нови и тоа сите фудбалери. Останува прашањето дали Марколин шпекулира или ФИГЦ и италијанската репрезентација ги кријат позитивните.

„Има петмина заразени фудбалери во националниот тим, плус уште двајца во лекарскиот оддел. Не сум сигурен, но овие случаи ќе излегоа на виделина и покрај обидот да се ‘затскријат’“, вели Марколин.

Уште од минатата недела, Мануел Локатели, фудбалерот за врска од Јувентус излезе позитивен после мечот во ЛШ и елиминацијата од Вилјареал.