Легендарниот Фабио Капело, екс-кормиларот на Милан, Јувентус, Реал Мадрид посочи дека Македонија била физички супериорна и многу поодчучна од Италија во епското чудо што црвено-жолтите го направија синоќа во Палермо со триумфот со 1-0 за „аѕурите“ да ги остават и без втор Мундијал по ред.

Капело жестоко распали по сонародниците дека го копираат Пеп Гвардиола од пред 15 години, не сфаќајќи дека сето тоа не носи резултат, без оглед на освоената европска круна ланското лето на Еуро 2020.

„Јас одамна зборувам дека ние го копираме фудбалот на Пеп Гвардиола од пред 15 години, а немаме квалитет за тоа. Македонија вчера беше физички супериорна во однос на нас и тоа во динамика, во сила и во одлучноста. Знаеа што сакаат. Ние сакаме нешто да копираме, ако го ‘преземеме’ германскиот модел нема да одиме напред, ако сакаме да бидеме како Шпанците, кои технички се супериорни, нема да може тоа да го сториме на повеќе од 50 отсто. Единствено нешто што треба да ископираме е германскиот модел да играме вертикално и во длабочина. А, во моментов во Италија, единствен тим што има некаков успех е Аталанта. Не може сѐ уште да сфатиме дека за да имате успех, мора да имате модел, да играте на некаков начин. И на крај сѐ се сведува на менталитетот“, вели Капело.