Селекторот-капитен на македонската ракометна репрезентација Кирил Лазаров денеска го објави поширокиот список од 35 ракометари за претстојниот двомеч со Чешка за пласман на Светското првенство во Полска и во Шведска од 11 до 29 јануари догодина.

Лазаров на список ги стави сите расположливи сили за пресметката со Чесите, исклучително важна за да се продолжи континуитетот на настапи на големите натпреварувања. Допрва ќе го скратува списокот и ќе ги избере ракометарите со кои ќе ги почне подготовките, а потоа и најподготвените за двете пресметки.

Во списокот ги нема Дејан Кукуловски од Пелистер и Михаил Аларова од Пролет, споредено со мартовскиот за Романија, а нови имиња се левиот бек на Пролет, Иван Џонов и пивотот на Тримо Тренер, Милан Лазаревски.

Мечот со Чешка во Злин е на 13 април од 20.15 часот, додека реваншот е на 17 април во Скопје од 19 часот.