Низ шпанските медиуми се појавија информација дека катарските сопственици креваат раце од ПСЖ и дека по завршувањето на Светското првенство ќе го продадат клубот. Еду Агире, новинарот на програмата „Ел Чирингито“, излезе со информација дека шеиците се откажуваат и го напуштаат клубот, а меѓу нив за заминување се подготвува и првиот човек на клубот Насер Ал Келаифи.

Таа вест е претставена и низ контекстот за продолжението од кариерата на Килијан Мбапе, кој наводно е решен во намерата да го напушти ПСЖ и да се пресели во Реал Мадрид. Дали ќе се обвистинат пишувањата на Агире, тоа е навистина непознато, особено бидејќи францускиот напаѓач би можел да остане во Париз.

Сепак, веста за заминувањето на актуелната сопственичка структура брзо беше демантирана со наводите дека во клубот воопшто не размислуваат за таков вид на промена и дека по оваа сезона ситуацијата ќе биде иста како и претходно. Поточно, клубот чиј тим го предводат Мбапе, Нејмар, Лео Меси и останатите фудбалски ѕвезди оваа вест ја нарече лажна.