Петтиот тенисер во светот, Стефанос Цицпас ќе има шанса да го освои Мастерс-турнирот во Рим, откако се избори за финале по победата со пресврт против Александер Зверев со 4-6, 6-3 и 6-3, па за титулата ќе се бори со подобриот од мечот меѓу Новак Ѓоковиќ и Каспер Руд.

Зверев го реши првиот сет во негова корист откако ја искористи единствената брејк топка и најпрво поведе со 4-3, по што сервираше без проблеми за 6-4.

Гркот врати на идентичен начин, но овој пат во вториот гем кога ја искористи првата брејк топка и поведе со 2-0, а потоа со тешка борба се избори за 6-3 во вториот сет.

Германецот го загуби ритамот во последниот сет и двапати му го препушташе својот сервис на ривалот, кој со 6-3 стигна до победата.