По неуспешната етапа во Европа каде настапуваше за Марсеј и Елче, Дарио Бенедето се врати во својата Бока на стартот на оваа година, но искусниот напаѓач е оној кој се претвора во главен трагичар за големииот аргентински клуб во најважното натпреварување во Јужна Америка.

Бока нема да може да се бори за трофејот во Копа Либертадорес и испадна многу рано уште во осминафиналето, откако загуби во двомечот со Коринтијанс.
По ремито од 0:0 во Бразил, Бока пропушти многу шанси на „Бомбонера“ за навреме да го реши победникот, а потоа беше сурово казнета во пенал рулетот.

Главен трагичар е Дарио Бенедето, бидејќи напаѓачот најпрво не реализираше пенал и го погоди дирекот во регуларниот дел од мечот, но потоа се посрамоти во клучен момент.

Во пенал рулетот при резултат 3:2, Бенедето можеше да стави точка во петтата серија, но наместо тоа, изведе ужасен пенал и ја испрати топката на трибините кај своите навивачи. После тоа пеналот го реализираше Гуедеш за 3:3, а на крајот Коринтијанс победи во пенал серијата со 5:6 за пласман во четвртфиналето.