Македонските репрезентативци Милан Ристовски (Спартак Трнава), Никола Серафимов (МОЛ Фехервар) и Марио Илиевски (Кишварда) ќе играат трето коло во Конференциската лига откако вчера со своите клубови обезбедија пласман во втората половина од циклусот за пласман во групната фаза.

Ристовски со Спартак Трнава го елиминираа велшки Њутаун со втора победа, сега на гости со 2-1, па со вкупни 6-2 обезбедија трето коло.

Серафимов, кој летово го засили МОЛ Фехервар, денеска загубија од Габала во Азербејџан со 1-2, но пресуди убедливата победа со 4-1 на првиот меч, кој беше деби за македонскиот репрезентативен стопер.

Марио Илиевски, пак, ги одигра завршните 20 минути за Кишварда која повторно со 1-0 славеше против казахстански Каират Алмати, меч кој пред една недела го реши Јасир Асани, екс-вардаровото дете за да го најави пласманот во трето коло на унгарскиот вицепрвак.