Јувентус влезе во длабока резултатска криза и нема да биде чудно ако Масимилијано Алегри не го дочека колото кое ќе следи по репрезентативната пауза, бидејќи фудбалскиот великан од Торино денеска загуби и од фенерџијата во Серија А.

Монца која направи тренерска смена и го назначи Паладино ја забележа првата победа во италијанската елита, и тоа со победа над очајниот Јувентус кој денеска повторно покажа дека игра ужасно лош фудбал.

Првото полувреме беше одбележано од големата глупост на Анхел Ди Марија кој со црвен картон го остави тимот на цедило, а тоа беше сурово казнето од домаќините кои постигнаа еден гол вреден победа во вторите 45 минути.

Херој беше Данецот Кристијан Гуткјер кој одлично го испрати центаршутот во 74-та минута за гол и победа на Монца која избегна од дното на табелата.

Овој пораз може да донесе голем потрес и сериозни промени во Јувентус, бидејќи работата на Алегри дефинитивно ќе се разгледува и анализира по петте меча без победа во сите натпреварувања.

Во истиот термин, Лацио беше уверлив кај Кремонезе и победи со 0:4, а потегот на мечот го изведе Милинковиќ Савиќ кој режираше нова генијална асистенција до Чиро Имобиле. Чиро постигна два гола, Милинковиќ Савиќ еден, а последниот беше дело на Педро. На третиот натпревар кој се играше од 15:00 часот, Фиорентина ја победи Верона со 2:0.