Младиот пливач Марко Пејчиновски (17 години), кој ја одушеви македонската јавност кога со само 12 години стана најмладиот кој го испливал 30-километарскиот маратон Охрид-Свети Наум, а кој летово исплива дури 64 километри во Охридското езеро, денеска беше примен од премиерот Димитар Ковачевски, кој му честита на досегашните спортски успеси.

Првиот човек на македонската влада на херојот Марко, кој плива со вроден хендикеп на ногата, му ја врачи одлуката за стипендија во износ од 200.000 денари, средства обезбедени преку Националната федерација „Спорт за сите”.

„Со доделувањето на стипендијата на овој млад спортист му беше укажана почит и благодарност за неговиот личен пример на пожртвуваност и високи спортски успеси кои Пејчиновски ги посвети на подигнувањето на свеста за лицата со ретки болести. Неговиот последен спортски успех, кој предизвика восхит, е препливувањето на делницата од 64 километри на релација Охрид – Струга – Св. Наум – Охрид. На средбата беше разговарано и за идните спортски и професионални планови на младиот спортист и за заложбите на Владата за вложување во модерна, безбедна и пристапна спортска инфраструктура наменета за рекреативно и професионално спортување, со цел да го развиваме спортот согласно со светските стандарди“, се вели во соопштението од кабинетот на Ковачевски.

На средбата присуствуваше и првиот човек на Агенцијата за млади и спорт, Наумче Мојсовски.