Домашната селекција не успеа да се избори за совршено сценарио, да игра финале на домашен терен, бидејќи беше совладана од Кина во супер возбудлива завршница. Последната четвртина почна со 47-43 за Кина, но Австралијките направија пресврт во втората половина од периодот и го чуваа минималното водство до последна минута.
Имаа 59-57 и напад на 50-тина секунди до крајот, кога Сију Ванг украде топка и овозможи израмнување, а истата кошаркарка имаше мирна рака и реализира слободни фрлања на три секунди до крајот за конечни 61-59 за Кина. Таа го заврши мечот со 14 поени, а Хан и Јанг беа поефикасни од неа со 19, односно со 18 поени. Австралија ја предводеше Саманта Виткомб со 15 коша.
Претходно, Американките доминираа со победа над Канада со 83-43, обезбедувајќи 12. финале, четврто едноподруго. Меѓу индивидуалките се истакнаа Стјуарт со 17 поени и Вилсон со 15, плус 12 скока.
САД има 10 злата од Светските првенства и само еден пораз во финале, во 1984 од Советскиот сојуз. Кина, од друга страна само еднаш играла финале и уште нема најсјаен трофеј. Во 1994 година загуби од Бразил. Финалето е закажано за утре во 16 часот по централно-европско време.
