Ни 50 поени на Стеф Кари не го спасија Голден стејт во Аризона (ВИДЕО)Голден стејт и понатаму игра во топло-ладно стил, далеку од шампионската форма од пролетва, па синоќа го запиша и деветтиот пораз по 15 меча од новата сезона.
Шампионот беше немоќен на гостувањето во Аризона, кај Феникс и загуби со 119-130. Стеф Кари имаше извонредна поентерска ноќ, постигнувајќи 50 коша или повеќе десетти пат во кариерата. Овој пат застана на точно 50, плус девет скока и шест асистенции, а постигна седум тројки. Сепак, немаше доволна поддршка од соиграчите и Феникс го доби мечот, предводен од триото Пејн, Букер, Бриџис, кои постигнаа 29, 27, односно 23 поени.
Во Источната конференција, пак, Бостон ја продолжи победничката серија и осми натпревар едноподруго и тоа на гостувањето кај Атланта, со 126-101. Само осум кошаркари постигнаа поени, но од нив дури седум имаа 14 или повеќе, предводени од Џејлен Браун со 22. Тре Јанг од поразениот тим беше најефикасен со 27. Со овој успех Бостон се одржа на чело на Истокот, со скор 12-3, држејќи дистанца од една победа пред Милвоки, кој исто така славеше, со 113-98 против Кливленд, на домашен терен. Брук Лопез продолжи со добрите партии, постигнувајќи 29 поени, а Јанис Адетокумбо запиша дабл-дабл со 16 коша и 12 скока, плус осум асистенции.
НБА РЕЗУЛТАТИ:
Феникс – Голден стејт 130-119
Атланта – Бостон 101-126
Милвоки – Кливленд 113-98
Денвер – Њујорк 103-106
Далас – Хјустон 92-101
Њу Орлеанс – Чикаго 124-110
Торонто – Мајами 112-104
Вашингтон – Оклахома 120-121
Орландо – Минесоа 108-126
Шарлот – Индијана 113-125
